СДСМ преку соопштение обвини дека растот на трошоците за живот дополнително го влошува животниот стандард на граѓаните, повикувајќи се на најновите податоци на Сојузот на синдикатите на Македонија (ССМ), според кои синдикалната минимална потрошувачка кошничка за јули изнесува 68.500 денари.
Од партијата посочуваат дека само за храна и пијалаци на едно четиричлено семејство му се потребни повеќе од 25.000 денари месечно, а доколку се пресметаат и трошоците за изнајмување стан од 60 квадратни метри, вкупните месечни расходи достигнуваат 83.873 денари.
Според СДСМ, минималната плата и натаму е значително пониска од 600 евра, а растот на просечната плата не ги следи зголемените животни трошоци, поради што граѓаните сè потешко ги покриваат основните потреби.
Партијата тврди дека инвестициите се намалени за повеќе од 60 проценти и дека земјоделците се соочуваат со сериозни проблеми поради поскапувањето на горивата и репроматеријалите, без, како што наведува, соодветна поддршка од Владата.
Од СДСМ предупредуваат дека по новото поскапување на горивата може да се очекува дополнителен раст на цените на основните производи, а со почетокот на учебната година и претстојната грејна сезона, граѓаните ќе се соочат со уште поголеми финансиски оптоварувања.
Во партиското соопштение се оценува дека економските политики на Владата негативно влијаат врз животниот стандард, при што СДСМ ја обвинува Владата дека не презема доволно мерки за заштита на граѓаните од растот на трошоците за живот.
