Низа силни земјотреси утрово ја погодија областа кај полуостровот Камчатка на рускиот Далечен Исток, поради што надлежните привремено издадоа предупредување за можна појава на цунами и ги повикаа граѓаните да се држат подалеку од крајбрежјето.
Според податоците на локалниот огранок на Геофизичката служба при Руската академија на науките, регистрирани се најмалку десет земјотреси, од кои најсилниот бил со јачина од 6,7 степени според Рихтеровата скала.
Првиот потрес бил регистриран во 6:51 часот по локално време и бил со магнитуда од 5,5 степени. Набргу потоа следувал земјотрес со јачина од 6,3 степени, а во текот на денот биле евидентирани и потреси од 6,2 и 5,3 степени, како и повеќе послаби земјотреси.
Сите потреси биле регистрирани во Тихиот Океан, на оддалеченост од околу 150 до 180 километри од градот Петропавловск-Камчатски.
Поради зголемената сеизмичка активност, властите издадоа предупредување за цунами и ги советуваа жителите да избегнуваат престој во крајбрежните области. Подоцна, руското Министерство за вонредни ситуации го укина предупредувањето, откако не беше утврдена непосредна опасност.
Засега нема информации за жртви или поголема материјална штета, а надлежните служби продолжуваат внимателно да ја следат состојбата во регионот.
