Повеќе од 190 починати: Епидемијата на ебола во Конго може да трае уште една година

Епидемијата на ебола што го зафати источниот дел на Демократска Република Конго сè уште не го достигнала својот врв, а постои стравување дека борбата со болеста би можела да трае и до една година, предупреди координаторот за операции на Меѓународната федерација на друштвата на Црвениот крст и Црвената полумесечина, Бруно Мишон.

— реклама —

„Многу е тешко прецизно да се процени во колкава мера се шири епидемијата, но мислам дека врвот не е зад нас, туку допрва претстои. Стравуваме дека ќе биде потребна една година за да се стави крај на оваа болест“, изјавил Мишон пред новинарите, пренесува Ројтерс.

— реклама —

Според достапните податоци, во Конго се регистрирани повеќе од 800 случаи на заразени со реткиот сој на вирусот Бундибугјо, кој предизвикува ебола. Досега, од последиците на болеста починале 192 лица.

— реклама —

Дополнителен предизвик во справувањето со епидемијата претставуваат недостигот од центри за лекување и отпорот на дел од локалното население кон строгите хигиенски мерки што ги препорачуваат здравствените власти.

И повеќе од еден месец по прогласувањето на епидемијата, надлежните сè уште немаат целосна слика за нејзините вистински размери, што ја отежнува организацијата на ефикасен одговор и контролата на ширењето на вирусот.