Повторно се разгоре пожарот во Словенија, гаснењето отежнато поради непристапниот терен

Пожарот над селото Срењи Врх, во близина на Крањска Гора во Словенија, повторно се разгорел денеска, откако минатата сабота бил речиси целосно изгаснат.

— реклама —

Гаснењето е насочено кон две жаришта на тешко пристапен терен, каде што интервенираат пожарникари, воен хеликоптер и два авиона „Ер трактор“.

— реклама —

На површина од околу еден хектар сè уште има подземни жаришта, односно пожарот тлее под површината. Целта на екипите е да го натопат земјиштето со вода и да спречат повторно ширење на пожарот на површината.

Поради непристапноста на теренот, противпожарните возила не можат да стигнат до пожарот, па гаснењето се врши од воздух.

— реклама —

Во Словенија и натаму е во сила предупредување за висок до многу висок ризик од пожари на отворено. Највисокото ниво на опасност важи во делови од југозападниот регион Приморска.

Пожарот избил минатиот петок и зафатил околу 30.000 квадратни метри, а се претпоставува дека бил предизвикан од удар на гром. Во саботата бил ставен под контрола, но во понеделникот повторно биле забележани помали жаришта.