Градското ѓубриште во Радовиш повторно било зафатено од пожар, а од ЈП „Плаваја“ тврдат дека постојат индиции оти огнот бил намерно подметнат.
Од јавното претпријатие информираат дека пожарот не започнал на локацијата каде што во последните денови се одлага комуналниот отпад, туку надвор од неа, по што се проширил кон највисокиот дел од депонијата каде што бил складиран отпадот собран во изминатите три недели.
Според нивните информации, и овој пат за потпалување биле искористени автомобилски гуми, што, како што наведуваат, укажува дека не станува збор за случаен настан.
Благодарение на навремената реакција на вработените во претпријатието, спречено било целосно зафаќање на одложените количини отпад и поголема материјална штета.
Од ЈП „Плаваја“ упатија апел до надлежните институции да преземат законски мерки за откривање на сторителите и спречување на вакви инциденти во иднина.
„Овие настани предизвикуваат штета врз животната средина, го загрозуваат здравјето на граѓаните и создаваат дополнителен товар врз службите што секојдневно работат на одржување на јавната чистота и редот во градот“, наведуваат од претпријатието.
Оттаму порачуваат дека ќе продолжат одговорно да ги извршуваат своите обврски, но дека за решавање на ваквите појави е неопходна институционална реакција и утврдување на одговорност.
