(Видео) Повторно гори депонијата во Радовиш – пожарникарите предупредуваат на опасност од отровни честички

Повторно избувна пожар на градската депонија во Радовиш, која пред неколку месеци предизвика сериозна загриженост кај жителите поради опасноста од штетните честички во воздухот. Пожарот бил пријавен во раните утрински часови, а пожарникарите успеале да го стават под контрола.

Од Територијалната противпожарна единица Радовиш информираат дека веднаш по пријавата излегле на терен, имајќи го предвид ризикот од загадување и последиците од претходниот пожар на истата депонија.

— реклама —

„Денес, во раните утрински часови, во нашата единица беше пријавено дека повторно е запален дел од градската депонија. Нашата единица веднаш излезе на терен, знаејќи ја висината на ризикот од отровните честички кои пред неколку месеци претставуваа голема опасност за нашите сограѓани“, соопштија од радовишката противпожарна единица.

Во интервенцијата за првпат било употребено новото противпожарно возило, набавено благодарение на донации од иселеници од Радовиш. Возилото било ставено во употреба по завршувањето на потребната законска документација.

— реклама —

Според пожарникарите, неговата моќност и големиот дострел на водениот топ овозможиле пожарот да биде ставен под контрола.

Во гаснењето биле употребени пет камиони со вода, а во интервенцијата наизменично учествувале повеќе пожарникари.

— реклама —

Од ТППЕ Радовиш апелираат до граѓаните на зголемена внимателност за да не се повтори ситуацијата од пред неколку месеци, кога пожарот на депонијата претставувал опасност за жителите.

Засега не се соопштени причините за повторното избувнување на пожарот, ниту дали е утврдено актуелно загадување на воздухот.