Жителите на Нов Белград утрово ги вознемирија густите облаци црн чад што се издигаа над градот, откако избувна голем пожар во трговскиот центар „Енјуб“. Засега нема информации за повредени лица.
На местото на настанот интервенираат околу 30 пожарникари со 10 противпожарни возила, кои се обидуваат да го локализираат огнот и да спречат негово проширување кон околните објекти.
Трговскиот центар „Енјуб“ е од полуотворен тип и располага со околу 400 локали, што дополнително ја отежнува интервенцијата на противпожарните екипи.
Поради големото количество чад, жителите на околните згради биле предупредени да ги затворат прозорците и да избегнуваат непотребно движење во близина на местото на настанот.
Причините за избувнувањето на пожарот засега не се познати, а надлежните служби ќе спроведат истрага откако огнената стихија ќе биде ставена под контрола.
