Пожарот кај Кадидере повторно се разгори, зафатени и неколку викендички

Повторно се разгори пожарот на отворено во близина на локацијата Кадидере кај Штип, каде што ноќеска беше изгаснат претходниот пожар. Според информациите добиени преку бројот за итни повици 112, состојбата на теренот брзо се влошила поради силниот ветер.

— реклама —

Територијалната противпожарна единица од Штип првично интервенирала со тројца пожарникари и едно противпожарно возило, но поради ширењето на огнот, околу 15:20 часот биле ангажирани вкупно 20 пожарникари и четири противпожарни возила.

— реклама —

Во гаснењето се вклучило и Доброволното противпожарно друштво Штип со четири возила и 12 членови.

Пожарот зафатил сува трева и грмушки, а поради тешко пристапниот терен и силниот ветер брзо се проширил. Во огнената стихија биле зафатени и неколку викендички.

— реклама —

Поради влошувањето на состојбата, покрај екипите од Штип, повикани се и противпожарни единици од околните општини. Активиран е и авион на Дирекцијата за заштита и спасување, а преку единиците на локалната самоуправа е побарана дополнителна помош од соседните општини.

Пожарот и натаму добива на интензитет, а сите расположливи локални сили се ангажирани во обид огнената стихија да биде ставена под контрола.