Ако празникот биде во недела, да не се одмара во понеделник: Стопанска комора бара измени на законот

Стопанската комора на Македонија подготвува предлог-измени на Законот за празниците, со кои се предлага промена на начинот на користење на неработните денови. Предлогот наскоро треба да биде доставен до Министерството за економија и труд.

— реклама —

Според предлогот презентиран од проектниот менаџер во Комората, Анета Димовска, не се бара укинување на празниците, туку ограничување и поинаков начин на користење на неработните денови.

Една од предложените промени е воведување лимит од 13 неработни дена годишно за секој вработен. Покрај 11-те празници што важат за сите граѓани, при склучувањето на договорот за работа, вработените би избирале уште два празника од празниците на верските или етничките заедници.

— реклама —

Втората промена се однесува на празниците што паѓаат во недела. Според предлогот, тие повеќе не би се префрлале како неработен ден во првиот нареден работен ден.

— реклама —

Од Стопанската комора оценуваат дека сегашниот систем создава организациски и финансиски потешкотии за работодавачите. Според нив, честите продолжени викенди имаат негативно влијание врз продуктивноста, а истовремено придонесуваат за одлив на потрошувачката во странство.

Од Комората се повикуваат и на анализа на 36 европски држави, според која Македонија со вкупно 16 неработни дена за мнозинството граѓани – 11 државни и пет верски – се наоѓа меѓу земјите со најмногу неработни денови.

— реклама —

Според анализата, во повеќето европски земји, празниците што паѓаат за време на викенд не се префрлаат на нареден работен ден.