„За Павлина од погон ќе се намалат празниците, а за дел од јавната администрација која дреме по кафиња, фризер и нокти – никако“

Ина Многуфина реагираше на најавените промени со кои се предлагаат ограничувања кај неработните денови, како и скратување на периодот во кој матичен лекар може да одобри боледување без специјалистички наод.

„Ќе се најде начин боледувањето од 7 да се намали на 5 дена без специјалистички, ќе се најде начин да се намалат деновите за Павлина од погон или шивална да може да работи и тогаш, само за дел од јавна администрација што дреме по кафиња, на фризер, депилација и нокти никако да се најде начин да се соберат во канцеларија“, напиша Многуфина.

— реклама —

— реклама —

Нејзината реакција следува откако Стопанската комора на Македонија подготви предлог-измени на Законот за празниците, кои треба да бидат доставени до Министерството за економија и труд.

— реклама —

Предлогот предвидува секој вработен да има најмногу 13 неработни дена по основ на празници годишно. Покрај 11-те празници што важат за сите граѓани, вработениот при склучување на договорот за работа би избирал уште два празника од оние што се однесуваат на верските или етничките заедници.

Се предлага и празниците што паѓаат во недела повеќе да не се префрлаат како неработен ден во првиот нареден работен ден.

— реклама —

Од Стопанската комора велат дека не предлагаат укинување на празниците, туку промена на начинот на нивното користење. Според нив, сегашниот систем создава организациски и финансиски тешкотии за работодавачите, а честите продолжени викенди негативно влијаат врз продуктивноста.

Одделно, со најавени измени на друг закон се предвидува матичните лекари самостојно да можат да одобрат боледување без специјалистички наод најмногу пет дена, наместо досегашните седум. За одредени дијагнози се предвидени исклучоци.