Моника Зајкова, претседателка на ЛДП и пратеничка, реагираше по информациите дека жичницата на Водно нема да работи во текот на летото и дека засега нема информација кога повторно ќе биде ставена во функција.
Зајкова потсети дека уште пред една година алармирале за состојбата со жичницата, кога во јавноста се појавија информации дека работела без дозвола.
„Не сме Ванѓа, ама укажувавме уште пред една година, тогаш ни се потсмеваа, денес алармот е кренат“, напиша Зајкова во објава на социјалните мрежи.
Таа оцени дека безбедноста мора да биде приоритет и предупреди дека пропустите во системот можеле да доведат до сериозни последици.
„Колку нови трагедии треба да ни покажат дека стандардите не се луксуз, туку се поставени заради безбедност и заштита?“, наведува Зајкова.
Според неа, поради неодговорноста и неажурноста на надлежните институции, граѓаните на Скопје, туристите и посетителите ова лето ќе останат без можност да ја користат жичницата на Водно.
