Предлог-законот за игрите на среќа пред јавноста, во фокусот заштитата на граѓаните

На седницата на собраниската Комисија за финансирање и буџет денеска се одржа јавна расправа по Предлог-законот за игрите на среќа и за забавните игри, на која учествуваа претставници на институции, експерти, здруженија и други засегнати страни.

— реклама —

Претседателката на Комисијата, Сања Лукаревска, ја отвори расправата и истакна дека целта е преку широка дебата да се дојде до поквалитетни законски решенија. Таа им се заблагодари на присутните за учеството и придонесот во процесот.

— реклама —

Предлог-законот го образложи министерката за финансии Гордана Димитриеска-Кочоска, која посочи дека новото законско решение има за цел да ја намали сивата економија во областа на игрите на среќа, да ја зголеми заштитата на учесниците, особено на младите, да обезбеди фер услови за работа и подобра контрола на финансиските текови.

Со предложениот закон се предвидува попрецизно дефинирање и класификација на игрите на среќа и забавните игри, утврдување на постапките за издавање и одземање лиценци, засилување на контролата врз приредувачите, како и утврдување на намената на приходите што се остваруваат од оваа дејност.

— реклама —

По презентацијата следуваше обемна дискусија, во која учесниците ги изнесоа своите ставови, забелешки и предлози за унапредување на законскиот текст и неговата примена во пракса.

На крајот од расправата, Лукаревска истакна дека во понатамошната собраниска процедура ќе бидат разгледани сите предлози и ќе бидат поднесени соодветни амандмани со цел да се обезбеди поквалитетно и поефикасно законско решение во интерес на граѓаните.