На 28 април 2026 година (вторник) делови од општините Центар и Карпош ќе останат без водоснабдување поради изведување и реконструкција на водоводната мрежа, информираат надлежните служби.
Во општина Центар, прекин во водоснабдувањето ќе има поради изведување водоводен приклучок ф-80мм на улица „Дебарца“ 29. Без вода ќе останат корисниците од делови на улиците „Дебарца“, „Владимир Полежиновски“ и „Стефан Јакимов-Дедов“. Прекинот ќе трае од 09:00 часот до завршување на работите.
Во општина Карпош, исто така на 28 април, ќе се извршува реконструкција на водоводна мрежа ф-300 мм на крстосницата „Париска/Хелсинки“. Поради тоа, прекинато водоснабдување ќе имаат корисниците од делови на улиците „Париска“, „Варшавска“ и „Хелсинки“, како и Средното училиште на Град Скопје „Георги Димитров“. И овде прекинот ќе започне во 09:00 часот и ќе трае до завршување на активностите.
Надлежните апелираат граѓаните навреме да обезбедат доволни резерви вода за основни потреби.
