Прелиминарни резултати во Израел: Блокот на Нетанјаху води со 57 мандати

Блокот на израелскиот премиер Бенјамин Нетанјаху освоил 57 пратенички места, наспроти 47 мандати за блокот против него, според прелиминарните резултати од парламентарните избори во Израел. Досега биле преброени гласовите од 41,9 отсто од избирачките кутии, а пребројувањето продолжува.

— реклама —

Арапските партии „Заедничка листа“ и РААМ заедно освоиле 16 мандати, покажуваат податоците на Централната изборна комисија. Резултатите сè уште не се конечни.

— реклама —

Нетанјаху, обраќајќи се во изборниот штаб на својата партија Ликуд во Ерусалим, изјави дека Израел има „историска и единствена можност“, заедно со американскиот претседател Доналд Трамп, конечно да ја отстрани иранската закана. Тој ги критикуваше партиите подготвени да соработуваат со арапските партии.

Трамп, пак, оцени дека неговата поддршка за Нетанјаху влијаела врз изборниот резултат, посочувајќи дека наместо очекуван убедлив пораз на премиерот, резултатите сега укажуваат на тесна трка.

— реклама —

Изборите забележаа и највисока излезност од 1999 година. До 22 часот гласале 77,7 отсто од избирачите, односно 5.695.682 граѓани. На изборите во 2022 година излезноста изнесувала 70,6 отсто.

На вонредните парламентарни избори се избираат 120 пратеници во Кнесетот, а право на глас имале околу 7,3 милиони регистрирани избирачи.