Премиерот Христијан Мицкоски изјави дека Владата нема да прифати нови чекори во евроинтегративниот процес без јасен, прецизно дефиниран план и извесен крај, нагласувајќи дека Македонија нема намера повторно да влегува во процес на отстапки без гаранции.
Одговарајќи на новинарско прашање за ставовите на европските лидери и позицијата на Бугарија, Мицкоски рече дека не очекува промена на ставот од Софија.
„Јас не очекувам од Софија променет став. Посебно сега кога таму новата влада е во политички меден месец. За да направат практично пренос на нивното домашно прашање, тие ќе добијат да креираат ваков тип на прашања, во кои ќе се покажат како луѓе кои ги штитат нивните интереси“, изјави Мицкоски.
Тој оцени дека Македонија има силни аргументи и дека државата ќе успее да ги одбрани своите позиции и дома и надвор.
„Ќе победиме и дома и надвор. Нашите аргументи сега се гласни, јасни и прецизни. Продолжуваме и понатаму да ја спроведуваме реформската агенда. Имаме целосно усогласена надворешна и одбранбена политика со Европската Унија“, рече премиерот.
Мицкоски посочи дека претседателот на Европскиот совет, Антонио Кошта, потврдил дека Македонија ги исполнува обврските во делот на реформите, владеењето на правото, јавната администрација и акцискиот план за малцинствата.
„Ако го изолираме ова што се бара од нас и притоа да имаме јасна перспектива, сѐ останато ние како Влада ќе го сработиме. Ние сме вистински фронтранери, а не тие што се третираат како замислени фронтранери“, изјави Мицкоски.
Премиерот нагласи дека Владата нема да прифати процес во кој нема јасно дефиниран исход.
„Оваа влада никогаш нема да влезе во процес без притоа да имаме јасно прецизиран план. Порано или подоцна ќе бидат некои други. Важно е што ќе оставите позади вас и дали кога ќе горите надвор на улица граѓаните ќе ја наведнат главата или ќе повратат“, рече тој.
Во завршницата од одговорот, Мицкоски упати критики кон политичките опоненти, истакнувајќи дека членовите на неговата влада влегле во политиката со интегритет.
„Ние сме луѓе кои во политиката влегле со интегритет. Не сме луѓе кои од голтари станаа милионери на грбот на граѓаните. Нашата задача и инспирација е да повратиме дел од изгубеното, а не дополнително да го загубиме“, изјави премиерот.
