Премиерот Христијан Мицкоски порача дека не ги прифаќа критиките дека новиот Закон за високо образование поставува престроги критериуми, оценувајќи дека проблемот е во квалитетот на системот, а не во барањата.
„Не можам да ги прифатам нападите дека критериумите се строги, а притоа немаме универзитет кој не е ниту во 2500 најдобри. Тоа е резултатот од сегашната состојба“, изјави Мицкоски.
Тој посочи дека условите за напредување во академската кариера не се невообичаени.
„Законот предвидува да пишуваат научни трудови во реномирани списанија од Web of Science база и тоа четири такви труда во рок од пет години за да бидете избран за редовен професор, а притоа државата тоа да го надомести. И тоа било висок критериум“, изјави Мицкоски.
Премиерот ја потенцираше слабата позиција на домашните универзитети на меѓународните листи.
„Од Универзитетот ‘Кирил и Методиј’, кој е најреномиран, не сме ниту помеѓу 2500 на Шангајската листа. Некогаш сме биле рамо до рамо, сега не сме“, изјави Мицкоски.
Тој додаде дека условите за работа на професорите се подобрени, но резултатите изостануваат.
„Порано можев да се согласам дека не се мотивирани поради ниски примања, но денес редовните професори имаат плата од 110.000 до 120.000 денари, а најчесто држат меѓу 4 и 8 часа неделно“, изјави Мицкоски.
Премиерот порача дека пасивноста не е оправдување.
„Мене не би ме држело место да седам и да ги набљудувам состојбите како тоне системот, а да не барам решение“, изјави Мицкоски.
Тој ги отфрли аргументите дека критериумите се превисоки.
„Немој да ми кажеш дека критериумите се високи, тоа е како да кажете водата е мокра или дека во август ќе биде топло. Тоа не е аргумент“, изјави Мицкоски.
Во заклучок, премиерот предупреди дека без промени во пристапот нема да се создаде квалитетен кадар.
„Се додека не поработиме со ваков тип на профил на луѓе, се плашам дека нема да генерираме доволно квалитетен кадар кој веднаш ќе може да се соочи со предизвиците, туку ќе мора да се доквалификува и преквалификува“, изјави Мицкоски.
