Преполовен бројот на нови случаи во Гостивар, регистрирани 293 за еден ден, вели Клековски

Бројот на нови случаи во Гостивар е речиси преполовен во однос на саботата, информираше министерот за здравство Сашо Клековски.

— реклама —

„Имаме преполовување на бројот на нови случаи. Имаме 293 нови случаи, што во однос на саботата, кога имаше над 600, е преполовување. Претпоставуваме дека препорачаните мерки го даваат посакуваниот резултат“, изјави Клековски.

— реклама —

Според него, досега се направени 192 епидемиолошки анкети, преку кои треба да се утврди точната хронологија на настаните, како и да се идентификуваат првите случаи и начинот на настанување на инфекциите.

— реклама —

Институтот за јавно здравје повторно зема примероци за испитување на водата од девет различни локации, како и од чешмите во домовите на семејства во кои има инфицирани лица.
Клековски најави и дека денеска и утре ќе биде надополнет инвентарот на болницата во Гостивар со потребните лекови.

„ИЈЗ и ЦЈЗ ќе вршат редовни испитувања на водата“, додаде министерот.