Во Основниот кривичен суд Скопје денеска се очекува да биде објавена пресудата за случајот против Раде Трајковски–Штекли и уште четворица обвинети, кои се товарат за учество во организирана криминална група поврзана со неовластено производство и трговија со кокаин и марихуана.
Според обвинението, првично во предметот биле опфатени 16 лица. Од нив, седум склучиле спогодба со обвинителството и добиле затворски казни од три до три и пол години, додека четворица признале вина, по што нивната постапка била раздвоена.
Обвинителството тврди дека групата дејствувала во периодот од јануари 2024 до јануари 2025 година и била организирана со јасно распределени улоги – од набавка до продажба на наркотични средства.
Според обвинителните наводи, првообвинетиот Раде Трајковски–Штекли се јавува како организатор и координатор на групата. Дел од обвинетите пред судот изјавиле дека не се чувствуваат виновни, додека Штекли претходно навел дека не го разбира обвинението.
