СДСМ преку соопштение обвини дека ослободителната пресуда за Никола Груевски во предметот „Талир 2“ и враќањето на имотот на ВМРО-ДПМНЕ се резултат на, како што велат, контролирано и партизирано судство.
Од партијата тврдат дека премиерот Христијан Мицкоски не може да се дистанцира од, како што наведуваат, „скандалозната пресуда“, посочувајќи дека во изминатите две години биле направени кадровски промени во обвинителството и судството.
„Обвинителката Ленче Ристовска беше тргната и ѝ беа одземени овластувањата. Јавно беа таргетирани судии и обвинители кои работеа на предметите ‘Талир 1’ и ‘Талир 2’. Власта го смени јавниот обвинител и постави обвинителка од тефтерчето на Сашо Мијалков. Се менуваа и назначуваа судии блиски до власта“, наведуваат од СДСМ.
Партијата оценува дека исходот од судскиот процес е резултат на, како што тврдат, заробено правосудство.
„Ете го резултатот денес – Никола Груевски, човекот кој избега од правдата, е спасен од одговорност, а имотот на ВМРО е вратен. Дури и самата судијка што го водеше предметот укажа на недоследност кај обвинителството и неадаптирање на обвинителниот предлог по измените на Кривичниот законик“, се наведува во реакцијата.
Од СДСМ повторно го обвинија Мицкоски дека не направил ништо за екстрадицијата на поранешниот премиер.
„Документите за негово враќање со месеци талкаа низ институциите и никогаш не беа испратени. Ништо од ова не беше случајност, туку свесна политичка одлука за заштита на Никола Груевски – човекот кој е симбол на криминалот и корупцијата“, соопшти СДСМ.
