Иран најави враќање на строга контрола врз Ормускиот теснец, како одговор на одлуката на САД да ја задржи поморската блокада на иранските пристаништа во Персискиот Залив.
Од здруженото заповедништво на иранската армија соопштија дека стратешкиот пловен пат повторно е ставен под „строг надзор и управување“, откако Вашингтон одбил да ја укине блокадата, и покрај тоа што Иран претходно дозволи ограничен и контролиран премин на танкери и трговски бродови. Ова практично значи затворање на оваа клучна рута.
„Сè додека САД не гарантираат целосна слобода на пловидба за иранските бродови, состојбата во Ормутскиот теснец ќе остане под строга контрола“, наведуваат од иранската војска.
Засега не е целосно јасно дали ова значи целосно затворање на теснецот, иако иранската државна телевизија објави дека пловниот правец повторно е „затворен“ и дека за премин ќе биде потребно одобрување од Техеран.
Податоците за движење на бродови покажуваат дека утринава имало зголемен сообраќај, што претставува прво поголемо движење низ теснецот по седум недели, но неизвесноста околу понатамошниот режим останува.
Ситуацијата се развива по краткото отворање на теснецот, кое следеше по десетдневното примирје меѓу Израел и Либан, кога Иран привремено ја ублажи контролата.
Американскиот претседател Доналд Трамп ја поздрави таа одлука, но истовремено потврди дека блокадата на иранските пристаништа ќе остане на сила.
Ормутскиот теснец е клучна глобална енергетска артерија низ која поминува значителен дел од светскиот извоз на нафта, па секоја промена во режимот на пловидба директно влијае врз глобалните пазари и безбедносната состојба.
