Нова судска одлука донесе пресврт во случајот со убиството на Данка Илиќ, откако Вишиот суд во Неготин ја прекина постапката против Радослав Драгиевиќ, татко на еден од главните обвинети.
Радослав Драгиевиќ (75) беше обвинет за непријавување на кривично дело и сторител, како и за помагање на сторителот по извршувањето на кривичното дело. Сепак, судот оценил дека нема доволно основи за продолжување на постапката против него.
„Советот на Вишиот суд во Неготин донесе одлука дека нема простор за обвинение, односно постапката против Радослав Драгиевиќ е прекината“, потврдија извори запознаени со случајот.
Одлуката ќе биде доставена до Вишото јавно обвинителство во Заечар и до адвокатот на Драгиевиќ.
Со оглед на тоа што е ослободен од обвиненијата, неговата одбрана нема да поднесува жалба. Од друга страна, Вишото јавно обвинителство во Заечар има право да ја оспори одлуката пред Апелацискиот суд во Ниш во рок од три дена од нејзиниот прием.
Според неофицијални информации, се очекува Апелацискиот суд да ја потврди одлуката на Вишиот суд, имајќи предвид дека претходно веќе го врати обвинението на повторно разгледување.
Во меѓувреме, Дејан Драгиевиќ и Срѓан Јанковиќ остануваат во притвор и го чекаат почетокот на судскиот процес по обвинението за тешко убиство на Данка Илиќ.
Случајот со исчезнувањето и смртта на двегодишната Данка Илиќ предизвика огромно внимание во јавноста во Србија и регионот, а истрагата и судската постапка и натаму се меѓу најследените случаи во земјата.
