Претрес во Кавадарци: Пронајдени ловечка пушка, недозволени средства за лов и 13 килограми месо од срндак

Полицијата пронашла ловечка пушка, недозволени средства за лов и околу 13 килограми месо од срндак при претреси на имот и дом во Кавадарци. Лишен од слобода е 69-годишен кавадарчанец.

— реклама —

Од МВР информираат дека претресите биле извршени на 26 октомври, со судска наредба, во викенд-куќа и помошни простории на местото викано „Васов град“, во кавадаречко, како и во домот во кој живее лицето.

— реклама —

— реклама —

При претресот во викенд-куќата, 69-годишникот доброволно предал ловечка пушка „Застава“, три ловечки патрони калибар 12, околу 13 килограми месо од срндак и девет недозволени средства за лов – примки. На една од примките биле забележани остатоци од биолошки траги.

За случајот е известен јавен обвинител, а по целосното расчистување и документирање ќе бидат поднесени пријави за „незаконит лов“ и „недозволено изработување, држење и тргување со оружје и распрскувачки материи“, согласно членовите 228 и 396 од Кривичниот законик.