Основното јавно обвинителство за гонење организиран криминал и корупција спроведе претреси на пет локации во Скопје, меѓу кои и во две здравствени установи, во рамки на истрага за организирана криминална група осомничена за нелегален увоз, дистрибуција и апликација на медицински лекови и медицински помагала.
Во акцијата се приведени три лица, меѓу кои двајца лекари.
Врз основа на обезбедените докази, јавен обвинител донел наредба за спроведување истражна постапка против четири лица. Тројца од осомничените се гонат за кривичните дела „злосторничко здружување“ и „повреда на права од индустриска сопственост и неовластена употреба на туѓа фирма“, додека четвртото лице е осомничено за „повреда на права од индустриска сопственост и неовластена употреба на туѓа фирма“.
По предлог на обвинителството, судија на претходна постапка при Основниот кривичен суд Скопје на сите четворица осомничени им определил мерки на претпазливост.
Од Обвинителството информираат дека предметот е отворен во април годинава, кога беше поведена истражна постапка против 17 физички и шест правни лица, за кои постои основано сомнение дека сториле кривични дела „злосторничко здружување“, „повреда на права од индустриска сопственост и неовластена употреба на туѓа фирма“ и „примање поткуп“.
Истрагата продолжува со цел целосно расчистување на случајот и утврдување дали во незаконските активности биле вклучени и други лица.
