Претседателката Гордана Сиљановска-Давкова по повод 2 Август – Илинден, Денот на Републиката, порача дека Илинден е „најсветиот македонски ден“ и повика на обединување околу идеалите на правната држава, демократијата и борбата против корупцијата и криминалот.
Во честитката таа истакнува дека 2 Август ги обединува Крушевската Република од 1903 година и Првото заседание на АСНОМ во 1944 година како темели на македонската државност.
„За мене, 2 Август, Илинден, е најсветиот македонски ден, денот на којшто во 1903 година, македонската републиканска идеја се отелотвори во Крушевската Република и денот кога во 1944 година, на АСНОМ, по вековна борба, се реализира правото на македонскиот народ на национална држава, во којашто се гарантираат правата на малцинските заедници“, наведува Сиљановска-Давкова.
Според неа, Илинден е симбол на желбата за слобода, храброста и подготвеноста за лична жртва.
„Илинден нè обврзува да бидеме достојни и одговорни наследници, а не само благодарни потомци на славните предци“, порачува претседателката.
Во честитката таа поставува и прашања за иднината на државата.
„Кој, ако не ние, ќе биде чувар на илинденскиот завет? Кога, ако не сега, ќе ја оправдаме довербата на илинденците и асномците? Каква Република ќе им оставиме на нашите сакани деца и внуци?“, наведува Сиљановска-Давкова.
Таа повика граѓаните, без оглед на етничката, верската или политичката припадност, да се обединат околу изградбата на европска, демократска и правна држава.
„Да ја градиме македонската држава како дом на среќни граѓани“, порачува претседателката во честитката, честитајќи им го на граѓаните Илинден – Денот на Републиката.
