Двајца припадници на Националната гарда застрелаа и усмртија вооружен маж по полициска потера, соопштија надлежните власти.
Инцидентот се случил откако полицијата добила пријава за пукање во центарот на градот и забележала маж со пиштол. Полицајците започнале пешачка потера, а во акцијата се вклучиле и двајца припадници на Националната гарда кои се наоѓале во близина.
Истражното биро на Тенеси соопшти дека станува збор за 20-годишниот Тајрин Џонсон. Според првичните информации, од засега неразјаснети причини ситуацијата ескалирала, по што гардистите отвориле оган и го усмртиле.
Полициската управа во Мемфис наведува дека непосредно пред пукањето осомничениот се свртел кон припадниците на Националната гарда, држејќи пиштол.
Случајот го истражува Истражното биро на Тенеси по барање на окружниот обвинител на округот Шелби.
Двајцата гардисти биле дел од оперативната група „Мемфис сејф“, формирана со поддршка на администрацијата на американскиот претседател Доналд Трамп за сузбивање на насилниот криминал во Мемфис. Трамп во март го посети градот и ја пофали работата на оваа оперативна група, наведувајќи дека придонела за намалување на насилниот криминал.
