Уставниот суд во Приштина утврди дека рокот за избор на претседател на привремените институции истекува на 6 октомври, со што се отвора можност за нови вонредни парламентарни избори доколку дотогаш не биде избран претседател.
Судот, постапувајќи по две барања на Демократската партија на Косово за оценување на уставноста на конституирањето на Собранието и изборот на Владата, утврдил дека рокот од 60 дена за избор на претседател започнал на 8 август и завршува на 6 октомври.
Во одлуката се наведува и дека Собранието било конституирано по истекот на уставно предвидениот рок од 30 дена, но тоа не влијае врз рокот за избор на Владата и претседателот.
Доколку Собранието не избере претседател до 6 октомври, ќе следуваат нови вонредни избори. Според член 66 од Уставот на привремените институции, изборите треба да се одржат најдоцна 45 дена по распуштањето на Собранието.
Последниот обид за избор на претседател пропадна откако Беким Сејдиу, заедничкиот кандидат на Демократскиот сојуз и Движењето Самоопределување, ја повлече кандидатурата. Одлуката уследи откако шест од вкупно 18 пратеници на неговата партија најавија дека нема да го поддржат.
Со тоа беше доведено во прашање обезбедувањето на потребното двотретинско мнозинство, односно присуството на најмалку 80 од вкупно 120 пратеници при гласањето за претседател.
Функцијата вршител на должноста претседател на привремените институции во моментов ја извршува претседателката на Собранието, Албулјена Хаџиу.
Политичката блокада во Приштина трае речиси две години. По изборите во февруари 2025 година не беше формирана Влада, поради што во декември истата година беа одржани нови избори.
По нив не беше избран претседател во рокот утврден од Уставниот суд во Приштина, па на 7 јуни беа одржани вонредни парламентарни избори.
