Вкупно 16 возачи биле лишени од слобода во текот на изминатото деноноќие поради безобѕирно управување со моторни возила, информира Министерството за внатрешни работи.
Од приведените, 11 лица управувале возила без да поседуваат возачка дозвола, четворица биле затекнати под дејство на алкохол, додека едно лице управувало возило под дејство на алкохол и покрај тоа што имало активна забрана за управување.
Возачи без возачка дозвола биле откриени во Скопје, Куманово, Гостивар, Кривогаштани и Кочани, а во Виница и Кочани биле затекнати лица кои управувале мопеди без соодветна дозвола.
Меѓу најсериозните случаи е возач од Општина Дебарца кај кого биле измерени 1,99 промили алкохол во крвта. Тој предизвикал и сообраќајна незгода, удирајќи во бетонска жардињера. Кај мотоциклист од Кавадарци биле измерени 2,03 промили алкохол, а кај возач на мопед од Кочани 1,88 промили.
Особено загрижува случајот со возач од Прилеп, кај кого биле измерени дури 2,45 промили алкохол во крвта, а дополнително било утврдено дека имал активна забрана за управување со моторно возило.
Од МВР соопштија дека по целосното документирање на случаите против сите лица ќе бидат поднесени соодветни кривични пријави.
Министерството упати апел до граѓаните да ги почитуваат сообраќајните правила и прописи, да не управуваат возила без возачка дозвола, под дејство на алкохол или во период кога имаат изречена забрана за управување, со цел зголемување на безбедноста во сообраќајот.
