Две лица се лишени од слобода во Тетовско откако полициски контроли утврдиле дека управувале возила без да имаат стекнато право на возачка дозвола.
Според Министерството за внатрешни работи, на 5 јули околу 13:50 часот, на крстосницата на улиците „Киро Ристовски Дрнц“ и „Штипска“ во Тетово, полициски службеници запреле мопед со тетовски регистарски ознаки, управуван од Н.Ф. (22) од село Мала Речица. При контролата било утврдено дека тој управувал без возачка дозвола, по што бил лишен од слобода по член 297-а од Кривичниот законик. Мопедот е привремено одземен, а по целосното документирање на случајот ќе следува соодветен поднесок.
Истиот ден, околу 14:50 часот во село Боговиње, по претходно случена сообраќајна незгода, полициски службеници извршиле контрола на четирицикл со тетовски регистарски ознаки, управуван од М.Б. (30) од Боговиње. И кај него било утврдено дека управува возило без стекнато право на возачка дозвола, по што бил лишен од слобода по член 297-а од Кривичниот законик. Четирициклот е привремено одземен, а по расчистување на случајот ќе биде поднесен соодветен поднесок.
