Од Демократската унија за интеграција (ДУИ) денеска преку соопштение упатија критики до коалицијата ВЛЕН, оценувајќи дека нивното јавно признание оти се „страшно слаби“ во Владата претставува доказ за политички неуспех.
Во соопштението ДУИ тврди дека политичката и институционалната положба на Албанците во државата се влошува, наведувајќи дека се намалува застапеноста во институциите и дека, според партијата, се доведуваат во прашање претходно стекнати права.
Од ДУИ оценуваат дека ВЛЕН не може да ја оправдува својата, како што велат, неспособност со влијанието на ВМРО-ДПМНЕ и прашуваат зошто остануваат дел од Владата доколку сметаат дека немаат доволно политичко влијание.
Партијата воедно повикува на институционален одговор за, како што наведува, сè почестите обвинувања дека економското влијание, бизнисите и јавните зделки во Скопје и пошироко се концентрираат околу тесен семеен и политички круг на Изет Меџити.
За овие тврдења не се приложени докази, а Изет Меџити и коалицијата ВЛЕН засега не се произнесоа по наводите изнесени во соопштението.
Од ДУИ порачуваат дека на Албанците им е потребно политичко претставување кое, според нив, ќе ги штити нивните интереси, достоинство и еднаквост.
