Пробиотиците можат да помогнат во ублажувањето на депресијата и анксиозноста

Секојдневното внесување пробиотици би можело да придонесе не само за подобро варење, туку и за подобрување на менталното здравје, покажува ново истражување објавено во списанието „Journal of the American Geriatrics Society“.

Научниците испитувале дали пробиотиците, познати како „добри бактерии“, можат да ја надополнат стандардната терапија со антидепресиви кај лица кои се соочуваат со депресија.

— реклама —

Резултатите покажале дека постарите лица кои, покрај редовната терапија, користеле и пробиотици, имале поголемо намалување на симптомите на депресија и анксиозност во споредба со испитаниците кои примале плацебо.

— реклама —

Истражувањето било спроведено во Индија и опфатило 58 лица постари од 60 години со умерена депресија. Сите учесници продолжиле да ги земаат своите вообичаени антидепресиви, додека дел од нив дополнително добивале пробиотски додаток во исхраната во период од 12 недели.

Покрај следењето на психолошката состојба на учесниците, научниците анализирале и биолошки показатели, вклучително и мозочен протеин важен за развојот и одржувањето на нервните клетки, како и составот на цревната микрофлора.

— реклама —

Иако кај групата што користела пробиотици биле забележани подобрувања, истражувачите нагласуваат дека тие не се замена за стандардната терапија и дека треба да се гледаат како дополнителна можност во третманот.

Експертите предупредуваат дека пациентите не треба самостојно да ги прекинуваат лековите и да се потпираат исклучиво на пробиотици, бидејќи нивната ефикасност сè уште треба да биде потврдена во поголеми клинички испитувања.

Научниот тим оценува дека резултатите се охрабрувачки и најавува нови, пообемни истражувања за подобро разбирање на врската меѓу здравјето на цревата и менталното здравје.