Владата ја продолжува мерката за намалено ДДВ за дизелот, со која даночната стапка од 18 отсто се намалува на 10 отсто, а мерката ќе важи до 12 октомври.
Министерката за финансии Гордана Димитриеска-Кочоска порача дека продолжувањето на мерката е дел од активностите за заштита на стандардот на граѓаните и одржување на стабилноста на домашната економија.
„Со продолжувањето на оваа мерка директно влијаеме врз малопродажните цени на горивата и го ограничуваме пренесувањето на надворешните ценовни притисоци врз цените на останатите производи и услуги“, истакна Димитриеска-Кочоска.
Таа додаде дека Владата ги следи движењата на меѓународните пазари и, кога е потребно, презема мерки со цел да се заштити стандардот на граѓаните.
