Едно од најпосетените места за рекреација и прошетка во Скопје – кејот на реката Вардар, добива нова урбана опрема, информираше градоначалникот на Град Скопје, Орце Ѓорѓиевски.
Во рамки на активностите поставени се нови клупи и корпи за отпадоци, со цел просторот да стане поуреден, почист и пофункционален за граѓаните кои секојдневно го користат.
„Ова беше барање на голем број жители кои секој ден го користат овој простор, а наша обврска е да одговориме со дела“, истакна Ѓорѓиевски.
Тој посочи дека паралелно со поставувањето на новата урбана опрема продолжува и редовното одржување на кејот, како и акцијата за чистење на коритото на реката Вардар на територијата на Град Скопје.
Според градоначалникот, целта е јавните простори да бидат попријатни и поквалитетни за престој на граѓаните.
„Чекор по чекор го уредуваме градот онака како што заслужуваат скопјани. Скопје се сака со дела“, порача Ѓорѓиевски.
