Премиерот Христијан Мицкоски изјави дека Владата продолжува со реализација на инфраструктурни проекти низ државата, нагласувајќи дека Битола останува еден од главните приоритети во владината агенда.
При денешната посета на Битола, тој истакна дека Владата е фокусирана на исполнување на ветените проекти и постепено решавање на долгогодишните проблеми.
„Продолжуваме да бидеме посветени на испорачување проекти, што е еден од нашите врвни приоритети. Во изминатите децении се направени многу пропусти, но работиме по приоритети, еден по еден, без да создаваме нови проблеми“, рече Мицкоски.
Тој призна дека во процесот на работа можат да се случат и грешки, но потенцираше дека тие не се намерни.
„Не греши само оној кој ништо не работи. Се извинувам однапред за секоја евентуална грешка. Ќе се трудиме таквите ситуации да бидат сè поретки, а кога ќе се случат – навреме да ги исправиме“, истакна премиерот.
Мицкоски им се заблагодари на градоначалникот, општинската администрација, советниците, пратениците и министрите за ангажманот во реализацијата на проектите во Битола.
Тој повтори дека градот ќе остане меѓу главните приоритети на Владата и најави продолжување на инвестициите во патната инфраструктура.
„Автопатот што ќе ги поврзе Битола и Прилеп се гради со забрзано темпо. Истовремено, сериозно размислуваме и за експресно поврзување на Битола со граничниот премин Меџитлија, проект што ќе го забрза сообраќајот и ќе го намали метежот во градот“, рече Мицкоски.
Тој порача дека Владата ќе продолжи да работи на проекти кои, како што нагласи, ќе придонесат Македонија да стане подобро место за живеење.
