Производството на електрична енергија од обновливи извори во 2025 година бележи раст од 11,43 проценти во споредба со претходната година, покажуваат податоците од Годишниот извештај на Регулаторната комисија за енергетика, водни услуги и услуги за управување со комунален отпад (РКЕ).
Според извештајот, вкупното производство на електрична енергија достигнало 6.123 GWh и останало речиси на исто ниво како во 2024 година.
Најголем раст е забележан кај ветерните електроцентрали, каде производството е зголемено за 32,5 проценти. Воедно, за првпат производството од фотонапонски електроцентрали го надминало производството од комбинираните централи.
Во текот на 2025 година, РКЕ изменила седум лиценци за производство на електрична енергија од фотонапонски централи, со што биле додадени системи за складирање енергија со вкупна инсталирана моќност од 7,1 мегавати.
Претседателот на РКЕ, Ацо Ристов, оцени дека воведувањето батериски системи за складирање претставува значаен чекор во енергетската транзиција.
„Складирањето на енергијата во периоди кога има вишок и нејзино користење кога побарувачката расте ќе придонесе за поефикасно управување со системот и намалување на вкупните трошоци“, изјави Ристов.
Во извештајот се наведува дека во 2025 година биле издадени вкупно 236 лиценци во секторот електрична енергија, од кои најголемиот дел се однесуваат на производство од обновливи извори. Со тоа, учеството на обновливите извори достигнало 58,22 проценти од вкупниот инсталиран капацитет во земјата.
РКЕ нотира и зголемена конкуренција на пазарот, каде активно работеле 21 снабдувач со електрична енергија. На берзата биле регистрирани 40 компании, а истргувани се 1.371 GWh електрична енергија, што претставува раст од 41 процент во однос на претходната година.
Во извештајот се посочува и напредок во интеграцијата на домашниот пазар со регионалните пазари на електрична енергија, преку активности поврзани со спојување на пазарите и приклучување кон регионалните механизми за пресметка на капацитети во Југоисточна Европа.
