Три лица, еден маж и две жени, се пронајдени починати во превртено возило на патот од граничниот премин „Блаце“ кон Скопје, информира Министерството за внатрешни работи.
Според МВР, синоќа во 22:35 часот во СВР Скопје било пријавено дека на патот ГП „Блаце“ – Скопје има превртено возило „мерцедес“ со германски национални ознаки.
Полициски службеници веднаш биле упатени на местото, каде што било утврдено дека во возилото има три починати лица – едно машко и две женски лица.
Смртта ја констатирал лекар од Итната медицинска помош.
Претходно, истиот ден во 13:40 часот, во Полициската станица Бит Пазар државјанин на Косово пријавил дека три лица се исчезнати. Последниот контакт со нив го имал на 18 јули околу 22:15 часот, кога тие се наоѓале на Меѓународниот аеродром Скопје.
МВР засега не соопштува дополнителни информации за идентитетот на починатите, ниту за причините под кои дошло до несреќата.
