Просечната нето-плата во државата во март достигнала 48.433 денари, што претставува годишен раст од 8,2 проценти, покажуваат најновите податоци на Државниот завод за статистика.
Според статистичките податоци, платите продолжуваат да растат во повеќе сектори, а најголем придонес за зголемувањето имаат транспортот, недвижностите и информатичко-комуникациските дејности.
Во споредба со февруари, просечната исплатена нето-плата е повисока за 4,9 проценти, додека во однос на просекот за целата 2023 година е зголемена за 7,2 проценти.
Најголем годишен раст е забележан во секторот транспорт и складирање, каде што платите пораснале за 15,6 проценти. Следуваат дејностите поврзани со недвижности со раст од 12,2 проценти и секторот информации и комуникации со 11,6 проценти.
И на месечно ниво најголемо зголемување има кај транспортот и складирањето – 10,9 проценти, додека кај недвижностите платите се зголемиле за 9,1 процент, а во ИТ и комуникацискиот сектор за 8,5 проценти.
Од Државниот завод за статистика посочуваат дека раст бележи и реалната нето-плата, која во март е повисока за 3,1 процент во однос на истиот месец минатата година.
