Премиерот Христијан Мицкоски денеска изјави дека сите летни манифестации и концерти организирани во рамките на одбележувањето на 35 години независност на Македонија не биле финансирани со средства од државниот Буџет.
Одговарајќи на новинарско прашање за трошоците за настапите на светските музички ѕвезди низ државата, Мицкоски оцени дека Македонија имала „историско лето“ и наброја дел од настаните и изведувачите – Стив Аоки во Битола, караванот „Силно светнал ден“ во повеќе градови, настапите на Пол Окенфолд и Пол ван Дајк во Струмица, рок-спектаклот со македонски изведувачи, концертот на Хозе Карерас во Скопје и вчерашниот настап на Дејвид Гета пред околу 50 илјади луѓе.
„Имам лоша вест за сите оние коишто шпекулираа, негодуваа, клеветеа, пласираа лажни информации, а молчев, не сакав да зборувам, затоа што оставав сето она коешто претставуваше навистина посебен момент за градовите низ земјава, да биде посебен момент и за граѓаните во тие градови. Што е лошата вест? Лошата вест е дека сите овие настани ги чинат нула денари. И граѓаните и Буџетот, сите овие настани ги чинат нула денари“, рече Мицкоски.
Тој ги повика граѓаните да ги проверат податоците преку платформата „Отворени финансии“, нагласувајќи дека настаните биле организирани со поддршка од општествено одговорни компании.
Мицкоски им се заблагодари на граѓаните и на сите што учествувале во организацијата, оценувајќи дека со настаните било покажано оти Македонија може да организира големи музички спектакли со светски изведувачи.
„Сè е организирано од општествено одговорни компании. Ова е домаќинска Влада, ова е промакедонска Влада којашто се грижи за граѓаните, пронародна, и секој денар буџетски средства се троши на транспарентен начин“, порача премиерот.
На крајот, тој уште еднаш повтори дека за организацијата на сите овие настани не биле потрошени буџетски средства.
„Лошата вест, уште еднаш ќе повторам за нив, е дека се потрошени нула денари буџетски средства за организација на сите овие настани, а сепак имавме незаборавно лето“, рече Мицкоски.
