Протестите на Генерацијата зет се шират низ Европа, следниот викенд на ред е Холандија

Протестното движење на младите од Генерацијата зет продолжува да се шири низ Европа, а по Германија, Франција, Швајцарија, Албанија и Португалија, нови демонстрации за наредниот викенд се најавуваат и во Холандија.

— реклама —

Холандскиот министер за внатрешни работи Питер Херма предупреди на загрижувачки повици за насилство и вандализам што се шират преку интернет и чет-групи на младите. Протести се очекуваат во повеќе холандски градови, но засега нема официјални информации за конкретните локации и бројот на потенцијални учесници. Причините за незадоволството се растечките трошоци за живот, условите во образованието, социјалната правда, полициското насилство и заштитата на климата.

Викендов младите во Германија протестираа во 34 градови, на собири организирани од групата „Генерација зет решава“. Во текот на неделата дојде до ескалација на насилството, со грабежи и фрлање молотови коктели кон полицијата. Германската полиција соопшти дека биле уапсени повеќе од 200 лица.

— реклама —

Најсериозни инциденти имало во Франкфурт, каде што демонстранти влегувале во продавници и краделе, како и во Келн, каде што биле фрлани шишиња кон полицијата. Во Берлин биле повредени 30 полицајци, а уапсени 56 демонстранти. Во Хамбург, каде што протестирале околу 6.700 лица, дел од демонстрантите запалиле бариери, по што полицијата употребила водени топови. Уапсени биле околу 120 лица.

— реклама —

Насилните демонстрации продолжија и во Франција. Според проценките, на протестите во 30 градови учествувале до половина милион луѓе. Во Париз, Лион, Бордо, Марсеј, Лил и Тулуз полицијата употребила солзавец, спреј и водени топови, а низ земјата биле уапсени 565 демонстранти.

Протести имаше и во Албанија, каде што меѓу главните барања е смена на премиерот Еди Рама. Полицијата викендов спречила демонстранти да влезат во зградата на Владата.

Во Швајцарија дошло до судири со полицијата, особено во Базел и Цирих, додека во Португалија илјадници луѓе марширале барајќи попристапни станови и најавиле дека ќе продолжат да се борат за правото на дом.