Четврти викенд протести во Франција: Се намалува бројот на демонстранти

Околу 7.000 луѓе учествувале на новите протести во Франција, организирани против високите животни трошоци и во знак на поддршка на младите. Демонстрациите се одржаа четврти викенд по ред во повеќе градови, но со значително помал број учесници отколку на претходните собири.

— реклама —

Според извори блиски до Министерството за внатрешни работи, до раните попладневни часови биле одржани 68 протести. Собирите започнале мирно, со засилено полициско присуство, по немирите, вандализмот и пожарите што ги одбележаа протестите на 17 октомври.

— реклама —

Демонстрациите се одржуваат во пресрет на конференцијата што Владата ја закажа за задутре. Предвидени се средби со работодавачите, синдикатите, како и со претставници на ученичките и студентските организации.

— реклама —

Незадоволството во Франција започна во септември, кога учениците и студентите протестираа поради состојбата во образовниот систем. Подоцна им се приклучија и граѓани незадоволни од растечките животни трошоци и политиките на претседателот Емануел Макрон.

— реклама —

Францускиот премиер Себастијан Лекорни во писмо до социјалните партнери порача дека ги разбира нивните очекувања во врска со платите и куповната моќ, како и загриженоста на работодавачите. Тој оцени дека социјалниот дијалог може да понуди конкретни одговори на барањата на граѓаните.