(Видео) Протестите против скапото домување ескалираа во Португалија: Полицијата влезе во кампот и ги растера демонстрантите

Португалската полиција во неделата наутро растера стотици демонстранти на плоштадот Росио во Лисабон и отстрани повеќе од 50 шатори поставени по протестите против владиниот предлог-закон за изнајмување станови.

Десетици полицајци, меѓу кои и припадници со службени кучиња, влегоа во кампот откако полицискиот командант Јури Родригеш трипати ги предупредил демонстрантите дека шаторите поставени без дозвола ќе бидат отстранети доколку самите не ги тргнат. Тој предупредил дека против оние што ќе пружат отпор може да биде поднесена пријава за попречување службено лице.

Стотиците луѓе кои го штителе кампот биле растерани со полициски штитови, а на одредени места полицајците употребиле и палки, пренесува „Ројтерс“.

— реклама —

Шаторите биле поставени по саботниот марш низ центарот на Лисабон, на кој учествувале неколку илјади луѓе. Полицијата во неделата отстранила и сличен, но помал камп на плоштадот Дом Жоао Први во Порто.

— реклама —

Социјалистичкиот пратеник Педро Делгадо Алвеш изјавил дека пред полициската интервенција на плоштадот Росио било мирно. Според него, немало оправдување за интервенција со употреба на сила, физичко насилство или удирање со палки.

Полицијата беше критикувана и пред една недела, кога на истите плоштади со палки растеруваше демонстранти, а десетици луѓе беа приведени.

Демонстрантите бараат владата да го повлече предлог-законот со кој се олеснуваат присилните иселувања и се укинуваат ограничувањата на висината на кириите за новите договори за закуп на станови.

— реклама —

Предлог-законот го помина првото читање во парламентот, додека крајнодесничарската партија „Шега“ беше воздржана при гласањето.

Премиерот Луиш Монтенегро во четвртокот одби да го повлече предлогот, но порача дека е отворен за измени пред конечното гласање, кое се очекува во наредните недели. Тој повика на приближување на ставовите меѓу партиите и постигнување заедничко решение, но нагласи дека основата останува владината програма.

Лидерот на Социјалистичката партија, Жозе Луиш Карнеиро, во саботата ја повика владата да разговара со опозицијата и демонстрантите, предупредувајќи дека не треба арогантно да ги наметнува своите ставови.

Португалија се соочува со една од најтешките станбени кризи во Европа, а меѓу најпогодените се младите. Цените на недвижностите од 2017 година се повеќе од двојно зголемени, додека кириите за новите договори речиси се удвоиле.

Протестите поради високите цени на домувањето во последните недели се интензивираат и во Шпанија, Франција, Германија и во други европски земји.