Прв западноевропски брод помина низ Ормутскиот теснец од почетокот на војната

Контејнерски брод во француска сопственост за првпат од почетокот на војната помина низ Ормутски теснец, што претставува значаен сигнал за делумно нормализирање на сообраќајот во еден од најважните светски поморски правци.

— реклама —

Станува збор за бродот „CMA CGM Kribi“, кој испловил од водите кај Дубаи и се движел кон Иран, при што пловел блиску до иранскиот брег, низ каналот меѓу островите Кешм и Ларак. Според податоците за следење, бродот отворено го емитувал сигналот за својата рута, а утринава бил регистриран во близина на Мускат. Информацијата ја потврдиле и извори запознаени со движењето на бродот.

Пловидбата низ теснецот беше речиси запрена откако пред повеќе од еден месец започнаа нападите врз Иран, при што низ него минуваа само ограничен број бродови, главно од земји со добри односи со Техеран.

— реклама —

Во меѓувреме, Иран воспоставува систем со кој однапред одобрува премин на бродови по рута долж сопствениот брег. Пакистан веќе обезбедил дозвола за дваесет бродови, а и дел азиски земји постигнале слични договори.

— реклама —

Европските држави, меѓу кои и Франција, започнале дипломатски напори за намалување на тензиите, но засега без конкретни резултати. Францускиот претседател Емануел Макрон најави дека неговата земја ќе работи на стабилизација на ситуацијата „откако ќе престанат бомбардирањата“.

Бродот е во сопственост на CMA CGM, трет најголем контејнерски превозник во светот, и плови под малтешко знаме. Според податоците, тој е натоварен со околу 5.000 контејнери, што укажува на полн товар.

— реклама —

И покрај овој пробив, следењето на поморскиот сообраќај во регионот останува отежнато поради чести нарушувања и манипулации со сигналите. Во исто време, Иран разгледува можност за воведување наплата за премин низ теснецот, што предизвикува загриженост кај земјите од Заливот и глобалните пазари, со оглед на значењето на овој правец за снабдување со нафта и гас.