Прва смрт од мали сипаници во Њујорк по повеќе од 30 години

Дете почина од заболување поврзано со мали сипаници во руралниот дел на северот на американската држава Њујорк, соопштија здравствените власти. Ова е прв смртен случај од ваков вид во државата по повеќе од три децении и четврти во САД од почетокот на годинава.

Според податоците на здравствените служби, до 30 октомври во САД биле потврдени 4.666 случаи на мали сипаници, речиси двојно повеќе од вкупниот број во текот на минатата година. Во државата Њујорк, до 24 октомври биле регистрирани 178 случаи.

— реклама —

Гувернерката Кети Хокул пред четири недели прогласи вонредна состојба поради епидемијата, со што беше овозможено вакцината да ја дава поширок круг здравствени работници и да се обезбедат дополнителни ресурси. Здравствените служби соработуваат со локалните власти за вакцинирање на невакцинираните лица, а истовремено го засилија следењето на новите случаи и нивните контакти.

Надлежните предупредуваат дека малите сипаници се исклучително заразни и можат да предизвикаат сериозни компликации, па дури и смрт. Заразените лица можат да го пренесуваат вирусот околу четири дена пред појавата на карактеристичниот осип, без да знаат дека се болни.

— реклама —

Според податоците на здравствените власти, една доза од комбинираната вакцина против мали сипаници, заушки и рубеола обезбедува заштита од 93 проценти, а две дози од 97 проценти. Граѓаните се повикани да го проверат својот вакцинален статус и да се консултираат со лекар.

Смртниот случај се случува во период на поширока расправа за политиката на вакцинација во администрацијата на американскиот претседател Доналд Трамп. Во август тој потпиша извршна наредба со која се поддржува препораката комбинираната ММР-вакцина да се замени со три одделни инјекции. Здравствени експерти го критикуваа предлогот, предупредувајќи дека повеќекратните посети на лекар можат да создадат пречки и да го зголемат ризикот децата да не ги примат сите потребни дози.

Критики се упатени и кон министерот за здравство Роберт Ф. Кенеди Џуниор поради неговите изјави со кои ја доведува во прашање безбедноста на вакцините и ја промовира тезата за нивна поврзаност со аутизмот, иако обемните научни докази не потврдуваат таква врска.

— реклама —

Пораст на бројот на заболени од мали сипаници е забележан и во други делови од светот. Меѓу земјите со најголем број случаи се Бангладеш со повеќе од 65.430, Индонезија со 46.578 и Гватемала со 31.222 случаи.

Европскиот центар за спречување и контрола на болести проценува дека ризикот во Европа е умерен за доенчињата помлади од една година, децата на возраст од една до пет години и лицата со ослабен имунитет. За постарите невакцинирани деца и возрасните ризикот е низок до умерен, додека за лицата со имунитет стекнат преку вакцинација или прележување на болеста е низок.

— реклама —

Според податоците наведени во извештајот, малите сипаници се ендемски во 12 европски земји, меѓу кои се Босна и Херцеговина, Франција, Германија, Италија, Полска, Романија, Русија, Турција и Украина. Најмногу случаи се регистрирани во Романија, каде што во 2024 година биле потврдени 30.692 заболени, наспроти 3.371 во 2023 година.

Шест европски земји повторно бележат ендемско пренесување на вирусот, врз основа на случаите регистрирани претходно годинава. Тоа се Ерменија, Австрија, Азербејџан, Шпанија, Обединетото Кралство и Узбекистан.