Новата учебна година за првачињата во Општина Центар ќе започне со бесплатен училишен ранец. Мерката продолжува петта година по ред, а со неа ќе бидат опфатени сите ученици запишани во осумте општински основни училишта.
Градоначалникот Горан Герасимовски истакна дека доделувањето на ранчињата прерасна во традиција и претставува поддршка за децата и нивните семејства на почетокот на образовниот пат.
„Првиот училишен ден е посебен момент за секое дете и за секое семејство. Петта година по ред сакаме да бидеме дел од таа радост и на сите наши првачиња да им подариме ранче за успешен почеток на нивното образование“, порача Герасимовски.
Од Општината посочуваат дека паралелно продолжуваат и инвестициите во подобрување на условите во основните училишта и мерките за олеснување на образовниот процес.
Бесплатните ранчиња ќе им бидат доделени на сите првачиња од осумте основни училишта на територијата на Општина Центар на почетокот на новата учебна година.
