Во Холандија е спроведен првиот случај на еутаназија кај неизлечиво болно дете, откако на почетокот на 2024 година стапија во сила правилата што ја овозможуваат оваа постапка, соопшти министерката за јавно здравје на земјата, Софи Херманс.
Во писмо испратено до парламентот, Херманс наведе дека специјалната комисија задолжена за процена на случаите на еутаназија кај деца го разгледала пријавениот случај, разговарала со лекарот кој ја спровел постапката и своите наоди ги доставила до Јавното обвинителство, кое треба да утврди дали постапката била извршена во согласност со законот, пренесува „Ен-Ел тајмс“.
Министерката не откри детали за возраста на детето, ниту за природата на болеста.
Според прописите усвоени во 2024 година, еутаназијата е дозволена за деца на возраст од една до 12 години кои боледуваат од неизлечива болест, под услов да постои согласност од родителите и процена дека не постои друг начин за ублажување на страдањето.
Мерката е наменета за тешко болни деца за кои се очекува да починат во догледен период, вклучително и пациенти со тешки вродени аномалии и метаболички нарушувања.
Пред усвојувањето на новите правила, еутаназијата во Холандија беше дозволена само за новороденчиња и за деца постари од 12 години, додека за децата на возраст од една до 12 години беа достапни палијативна седација и други методи за ублажување на симптомите.
