Полицијата во Сиетл соопшти дека најмалку тројца вооружени напаѓачи учествувале во престрелката на фестивалот на храна „Bite of Seattle“, во која загинаа три лица, а четворица беа повредени.
Според истрагата, станува збор за пресметка меѓу две ривалски групи, кои отвориле оган една кон друга пред самиот крај на тридневниот фестивал.
Меѓу осомничените е и 15-годишник, кој е приведен и му е одреден притвор во малолетничка установа поради истрагата за нападот и прекршување на законите за оружје. Вториот осомничен, 19-годишник, загинал на местото на настанот, а полицијата трага по најмалку уште едно лице кое се сомничи дека учествувало во престрелката.
Обвинителството на округот Кинг се очекува во среда да ја добие комплетната документација од полицијата, по што ќе одлучи дали ќе поднесе обвинение против малолетниот осомничен.
Во текот на истрагата имаше повеќе спротивставени информации од надлежните. Градоначалничката на Сиетл првично соопшти дека две лица се приведени, но подоцна ја повлече таа изјава. Полицијата, пак, објасни дека сакала да објавува само проверени информации поради хаотичната ситуација.
Канцеларијата на судскиот вештак ги објави имињата на загинатите – Карлос Израел Санчез Виљалба (44), Ешли Вајтхед (56) и Џуниор Си Нико Семо (19), кој според истрагата бил еден од напаѓачите.
Во престрелката беа повредени четири лица – двегодишно момче, двајца мажи на возраст од 23 и 27 години и 39-годишна жена. Сите по укажаната лекарска помош биле пуштени на домашно лекување.
Инцидентот се случил во неделата околу 18 часот по локално време, за време на завршницата на фестивалот „Bite of Seattle“, кој секоја година привлекува стотици илјади посетители.
Ден по нападот, на угостителите им било дозволено да се вратат на просторот на фестивалот за да ја подигнат својата опрема, при што затекнале сцени од паничното бегство на посетителите – недојадена храна, оставени чинии и траги од крв. За вечерва е најавено бдение во чест на жртвите.
