Три лица загинаа, а петмина се повредени, меѓу кои и двегодишно дете, во вооружен напад што се случи на Фестивалот на храната во Сиетл, соопштија американските власти.
Градоначалничката на Сиетл, Кејти Вилсон, информираше дека едно лице е приведено, додека полицијата продолжува да трага по уште еден осомничен.
Помошник-началникот на полицијата, Тајрон Дејвис, изјави дека две лица починале на местото на нападот, а третата жртва им подлегнала на повредите во болница.
Полицијата веќе била присутна на фестивалот, поради што реагирала веднаш по пукањето. Според Дејвис, еден од напаѓачите се предал без отпор, додека вториот успеал да избега и по него сè уште се трага.
Конгресменката од Сиетл, Прамила Џајапал, го осуди нападот, оценувајќи го како „бесмислено насилство“.
Пукањето се случило во близина на кулата „Спејс нидл“, каде што во моментот се одржувал голем фестивал на храната. Очевидци изјавија дека најпрво помислиле оти станува збор за огномет, но веднаш потоа настанала паника и луѓето почнале масовно да бегаат.
„Го слушнавме првиот истрел и сите почнаа да трчаат. Само се обидувавме да најдеме безбедно место“, изјавија очевидци за локалните медиуми.
