Несекојдневен инцидент се случил во Сиетл кога постара возачка, следејќи GPS навигација, со својот автомобил завршила на шините на градската железница. Поради тоа, дел од сообраќајот на линијата „Sound Transit 1“ бил прекинат неколку часа.
Според полицијата, жената управувала „Mazda CX-5“ и ги следела упатствата од навигацијата кога навлегла на трасата на градската железница во близина на станицата „Mount Baker“. Возилото се заглавило на шините, поради што железничкиот сообраќај бил привремено запрен.
Сведоци снимиле моменти кога теренското возило се обидувало да се движи по шините пред конечно да застане. Кога пристигнале итните служби, возачката веќе била надвор од автомобилот.
Полицијата соопшти дека жената не била под дејство на алкохол, но делувала збунето и бавно одговарала на прашања. Превентивно била пренесена во болница, каде било утврдено дека е во стабилна состојба.
Поради инцидентот, сообраќајот меѓу одредени станици бил прекинат, а патниците биле превезувани со автобуси. Нормалниот железнички сообраќај бил воспоставен неколку часа подоцна.
За среќа, во инцидентот немало повредени, а се завршило само со материјална штета и привремен прекин на сообраќајот.
