Четириесет и шестгодишниот Дарко Весковиќ, познат под прекарот Прика, е убиен денеска околу 16 часот во кафуле во белградската населба Кумодраж, додека уште едно лице е тешко рането.
Напаѓачот по пукањето избегал, а српската полиција започна обемна потрага и ја активираше акцијата „Вихор“.
На местото на настанот има голем број полициски службеници, додека форензичките екипи вршат увид во локалот каде што се случило убиството.
Според српските медиуми, на снимките од безбедносните камери се гледа како Весковиќ станал за да поздрави маж кој влегол во кафулето. Откако му подал рака и се свртел да се врати на масата, напаѓачот извадил пиштол и од непосредна близина му пукал во главата.
Потоа, пред да побегне, напаѓачот испукал неколку куршуми и кон В. М. (49), кој седел на масата со Весковиќ, и нанел тешки повреди.
Во моментот на нападот во локалот имало повеќе гости, но според информациите, никој друг не е повреден.
Весковиќ претходно беше обвинет за убиството на Блажо Ѓуровиќ, кој беше ликвидиран во март 2018 година во белградската населба Душановац. По отворањето на истрагата, по него беше распишана меѓународна потерница, а во април истата година беше уапсен во Загреб.
Според претходни медиумски информации, Весковиќ наводно бил близок до шкаљарскиот криминален клан, додека Ѓуровиќ се поврзувал со спротивставениот кавачки клан.
