Вознемирувачко видео кое се споделува на социјалните мрежи предизвика бројни реакции, откако на снимките се гледаат млади лица како пукаат со огнено оружје.
Видеото го објави адвокатот Умејр Мухамеди, кој реагираше на ваквото однесување и постави прашање за опасноста што ја носат ваквите постапки.
„Ова не е во Курдистан, туку во Гостивар. Разбирам сѐ, но не ми е јасно која е поентата млади лица со пиштоли и со калашникови да пукаат, па уште и да се објавуваат на социјални мрежи. Замислете колку луѓе имаат страдано поради вакви глупости“, напиша Мухамеди.
На видеото се гледаат три лица кои држат пиштол подигнат во воздух, додека околу нив има повеќе лица кои го снимаат настанот со мобилни телефони, а и професионална камера.
Засега не е познато кога точно е снимено видеото, а на снимката има возило со гостиварски таблици. Не е познато ниту дали за случајот постапуваат надлежните институции. „Скопје1“ ќе побара информација од Министерството за внатрешни работи дали е пријавен настанот и дали е започната истрага.
