„Пулс“ бил без прописен излез за евакуација, одбраната го оспорува градежното вештачење – родителите велат дека тоа е аргументирано

Обвинетите во судскиот процес за пожарот во дискотеката „Пулс“ го оспоруваат градежното вештачење со кое беа утврдени повеќе сериозни пропусти во објектот. На денешното рочиште, деканот на Градежниот факултет во Скопје, Горан Марковски, кој го предводи тимот што го изработи вештачењето, одговараше на прашања од одбраната.

Адвокатката Ивана Коцевска, која го застапува сопственикот на дискотеката, во своите прашања го оспоруваше заклучокот дека реконструкциите на објектот влијаеле врз неговата безбедност. Според тезата на одбраната, внатрешните тераси, односно галериите, не предизвикале оштетувања на меѓукатната плоча.

— реклама —

Во судницата обвинетиот Гроздан Милковски наведе дека потпорите со кои била зголемена носивоста ги поставувал лично.

Професорот Марковски, пак, остана на ставот дека начинот на кој биле изведени интервенциите создавал статички ризик.

— реклама —

„Корисниот товар за дискотеки е околу 500 килограми по метар квадратен, тоа значи дека имаме дополнителен товар од 50 тони. Тоа е товарот со додавањето на галериите. Најнеповолното статичко влијание од начинот на кој се изведени е опасноста од пробивање на столбовите низ тенката меѓукатна плоча од 12 сантиметри“, изјави Марковски.

За родителите на загинатите, пак, вештачењето е јасно и поткрепено со аргументи. Тие сметаат дека неговото значење не се однесува само на состојбата на самиот објект, туку и на постапувањето на надлежните институции.

— реклама —

„Одбраната се обидува да го оспори вештачењето, но со напади врз вештаците не се бришат документите, фактите и утврдените пропусти“, изјави Александар Наунов, татко на загинатата Надица.

Според градежното вештачење, изработено од професори на Градежниот факултет, објектот „Пулс“ немал ниту еден прописен излез за евакуација. Единствената функционална врата, според наодите, била двојно потесна од пропишаните стандарди.

Во вештачењето се наведува и дека материјалите употребени во внатрешното уредување придонеле за брзото ширење на огнот.

Со денешното испрашување на вештакот, одбраната се обидува да ги доведе во прашање клучните технички заклучоци за состојбата и безбедноста на објектот, додека обвинението и семејствата на жртвите се повикуваат на утврдените факти и документацијата содржана во вештачењето.